الرئيسية / ابداع القوافي / ماحدٍ على وجه البسيطه بمرتاح

ماحدٍ على وجه البسيطه بمرتاح

ماحدٍ على وجه البسيطه بمرتاح 
كل معنـّيه الطمع في حياته 
 
اللي غني يبغى زيادات وارباح 
يسعى وكنْ الفقر داخل عباته 
 
واللي فقيرٍ صار كاتب ومساح 
يضرب حساب الوقت ومعادلاته 
 
على القليل يروح راضي وسمّاح 
وإن عدّمت قال الزمن ليه شاته 
 
والمال يأهل المال للخير مفتاح 
لاصار يعرف صاحبه واجباته 
 
كم تاجر عاش السعاده والافراح 
من طيب مداته ومن حسن ذاته 
 
يتعب وينسيه التعب وين ماراح 
يلقى صدى الترحيب لمبادراته 
 
وكم تاجر ميسور وإيدينه شحاح 
يشقى ويجمعها وتقلق مباته 
 
محروم ماله فالجمايل والامداح 
خيره قليل وجودته وإحسناته 
 
والمال كم علاّ من الساس ماطاح 
والفقر كم وطّى عليّ مْن علاته 
 
والناس فيهم طيب القلب مضواح 
عون على ميل الزمن وإعثراته 
 
وفيهم رديّ اسرار مدّاح قدّاح 
يضحك ولايمن ظهرك إغدراته 
 
وفيهم غني لو مامعه غير مسباح 
تجارته في صومه وفي صلاته 
 
وفيهم فقير النفس صيّاح ليـّاح 
لو ضاق درج البنك بمعاملاته 
 
احدٍ يجلّي الهم والهم ينزاح 
كنـّه يقول العمر هاذي طراته 
 
واحدٍ يجي بالهم ويزيد الاتراح 
الله ..  يقل من البشر عيناته 
 
عبدالله بن شايع الزهيري

عن admin

Avatar

اترك تعليقاً

لن يتم نشر عنوان بريدك الإلكتروني.