شعور الحب

محبتك هذي تراها ظليمه
اصدق شعور الحب بحساس كذاب

كنت بحناني والمشاعر كريمه
وانت بجفاك اليوم شيبت الاهداب

جيتك ونياتي تجاهك سليمه
حتى اندفاع الحب جاء ماله اسباب

لعبت لك لعبه ولكن قديمه
يوم انت صافي والصخر للغلا ذاب

الحب راح بوقت وافي وشيمه
والا انت يالمقصود بالهرج لعاب

وينك ووين الحب ماشفت غيمه
بيني وبينك والغلا لوم وعتاب

فيك المشاعر والاحاسيس نيمه
دامك حنانك غاب عنك الغلا غاب

افهم على الطاير ولاني غشيمه
الله يسهل لك ولاباقي حساب

كان الوفاء عندك بمعنى جريمه
هذا الوداع وخاطري يالغلا طاب

للخاطر المكسور صبر وعزيمه
ياليت جرحي يوم جاني من اغراب

عقب المحبه صرت كني غريمه
كيف الغلا يقلب عداوه من احباب

طبعي كذا ولا اعترف بالهزيمه
يانته يانا والحب قاسي وغلاب

ياقلب فيك الصبر نعمه عظيمه
من صد صد و سكر بوجهه الباب

 

عن حصة بنت عبدالعزيز

اترك تعليقاً

لن يتم نشر عنوان بريدك الإلكتروني.