الرئيسية / ابداع القوافي / ياعيون اهلي : الشاعر فهيد زيد

ياعيون اهلي : الشاعر فهيد زيد

 

 

اكحل عيونك بدمعك لين كحلك يسيح
‎وامسح دموعك بـ اصابع كفك المخملي

يمكن دموعك علشاني .. تفيح وتفيح
‎وازعل على شان عينك ياعيون اهلي

جيتك بوجه البياض وباللسان الفصيح
‎واللي خلاف الستاير شي ماهوب الي

سـمعت من يطعن غيـابي بهرج قبيـح
‎وخليت عقلي يجاوب عن جواب جهلي

حر نفض ريش حلمه لو جناحه جريح
‎يشـوف ليل السـهر عن ناظره منجلي

لودوروا لي وانا ارقا للمعالي مطيح
‎انا على الأرض محدٍ نازلٍ منزلي

ياالعفري الي جسدك من المرامي صحيح
‎ياليت جوّك من اللي يشـتهونك خلي

وراك برق وربيع القاع دونك فسيـح
‎وريح الندى يجذبك للمرتع المعتلي

تنبت مرابيك قيصوم ومفاليك شيـح
‎مالك ولي غير مرباعك وربك ولي

تجفل ليا حرك اطراف الزماليق ريح
‎وتفرح ليا طاح فوق سهول دربك ولي

تلد فيك العيون الطامعة يامليح
‎والرامي اللي يجيك ومزهبه ممتلي

سمعت فيك المديح وقلت فيك المديح
‎وخليت ضو القصيد بدفتري تصطلي

اللين فيك يتساوى بالحرير المريح
‎من خصرك المنزوي لا عودك الممتلي

عينك مثل حد سيف من تصيبه يطيح
‎لوهو من اهل البخوت وبين ربعه شلي

لك في ضلوعي خيالٍ له سنه مستريح
‎يرعى عروقي وهـو ماله بعيني حلي

تسوا غلاي الصدوق ان عودت للصحيح
‎وتزهى على عنقك الفارع ثمين الحلي

عطني من احساسك الدافي كلامٍ صريح
‎وانا اشتري لك من اسواق الغلا ماغلي

ماودك انه يشـوفك غير وجهٍ فليح
‎ولا ودي انك تسوق ظنونك الا علي

 

 

عن حمده الرسلاني

Avatar

اترك تعليقاً

لن يتم نشر عنوان بريدك الإلكتروني.