الرئيسية / ابداع القوافي / واقع امّة. للشاعر. سعيد السحيمي

واقع امّة. للشاعر. سعيد السحيمي

واقع امـــــه

الف الـــوف الناس مثلي وغيري
يشكون جل هموم وسط الضميري
شيئا نشوفه من كبير وصغيري
يالله تجلى الهم وتعز الاسلام

معــزة (ن) فيها مذلةْ عـــــدوه
تقهرخبيث النفس حقده وسوه
افـــــواج تدخل فيه يزداد قوه
باذن الذي للسر والغيب علام

الباء بلينا بالسنين التوالي
بأشيا كثيره كان حل المجالي
ساعات تاتي من رجالن غوالي
الله يكفينا من اشرور الايام

التاء تجيك من القريبين زله
منها الفكر يحتار باللي حصله
لايعتذر واليا غلط جاك كلــــه
واليا زعل يمكن تشوفه بعد عام

تباعدوا ياصاحبي كل الاقراب
عن بعضهم من فعلهم صاروا اغراب
ثم ادعوا بالوقت ياكاف الاساب
والوقت ماله ذنب ياراع الاوهام

الثاء ثلاث اقسام شفت الاوادم
القسم الاول يسهر الليل دايم
خــــــلّا نهاره ليل تلقاه

نايم طول النهار وميت القلب لانام

ابوه من كثر الطلب عاش محروض
وش يرتجي من واحديجمع فروض
ماينفع المسكين نفسه ومفروض
ينام فمراح البهايم والانعام

والثاني من الرزق ماله نصيبي
ورى البني تلقاه يهذب هذيبي
اليا حصلت سوا بها سوات ذيبي
وش خمنكم بالذيب لاطب الاغنام

ذيب ولقى شاتن طريفه خليه
ماهي على بس الشباب الخطيه
هن السبب لاتعذرون البنيه
سمعي بذاني يوم تمليه الارقام

وثالث قسم أهل الوفاء والحميه
جودن وطيب وفيهم المرحميه
للي بحاجتهم صباح ومسيه
معربين الساس واخوال واعمام

والجيم جملة فعلهم يرفع الراس
خوه ونخوه للرجاجيل مقياس
صاهر وراحم يافتى خيرة الناس
لا قالوا الاجواد يانعم الارحام

واللي طريقه بالخنا والرذيله
يرميك في دربه وشرن حصيله
عارٍ على ربعه ولابه نفيله
إياك واللي رفقته ترِّث آثام

والحاء حلال الناس يالقرم غالي
اكرم يدينك عن حرام بحلالي
لايصير سوّك للرفيق الموالي
وتصير للمعروف جاحد وظلَّام

والخاء خلاف المرجله والشجاعه
وعلمٍ يسر آبوك لحظة سماعه
الطيب واللينه لكل الجماعه
والصدق ثم الصدق راعيه قدام

ماهو كما الكذاب دايم ينكس
بنات ورده جابهن شخص مفلس
الكل من هرجه وفعله تحسس
الكذب يالاجواد للخُلق هدام

الدال درب الجود كلا يدلِّه
مع مرفضيَّة نفس فنجال دله
لمسيرن لامن لفى في محله
يغني عن مفطح من الضان ويدام

الجود ترحيبك بضيفك ليا جاك
فلة حجاجك يوم بالبيت ينصاك
ان كان له لازم تقضيه مولاك
بيرفعك في يوم تتزاحم اقدام

ابيوم حشرن كل يقول نفسه
يوما عصيب وفوق الاعناق شمسه
موقف عظيم وزبدة الهرج همسه
يالله نرجيك العفو كل الايام

الذال ذاب القلب من هول مافيه
يوم المحدث والمطوع هرج فيه
المسعد اللي دوم فرضه يصليه
ولاضاع عمره بالتماني والاحلام

هذا وكثير الناس عارف وداري
من يقتل الغافل بفعل اختياري
بالاخره خسران قال انتحاري
بالنار لوصلى ولو ياملاصام

تقتل بليا ذنب نفسن بريه
في غفلتن منها بخطه دنيه
ليه الغدر وين العقول السويه
وش مكسبك ياراعي الغدرمادام

الراء رويت النفس واشبعتها سو
حقدك دفين وطعت شيطانك بقو
ترضي شياطين البشر والسبب هو
عقل مريض وغرروا فيك خدام

سلمت عقلك للعداء دون تمييز
واصبحت عايش في كهوف ودهاليز
مطرود خايف ترتجف قبل ماتعيز
ليل تداري ظلمته وجه الاجرام

والزاء زمانك يوم غرك بزينه
امَّا على شانك جفا النوم عينه
يعطيك شايب ماتجيبه يدينه
اسقيتهم كاس المنيه والاسقام

عقولكم قد غرورها وطارت
تركض ورى وهمك والا فلاك دارت
الموت مايرسل رساله يباغت
وعزي لمن طاوع هوى النفس وازمام

نفسه وعقله سلمه شخص ثاني
يامر وينهى فاقد الراي واني
يصرّفه حاقد بكل المعاني
فلاتغرك بالمخاليق الاجسام

السين سال الدمع من موق عيني
يومٍ نشوف الفعل بالمسلميني
اهل الطغى والحقد والحاسديني
باهل العراق الفرس والروس بالشام

والشين شين افعالهم يوم بشار
نخى المجوس وعاونه حزب الاشرار
وش صار للسنه بها صار ماصار
عزل بليا سلاح نسوان وايتام

الصاد صبرا قد تعدى حدوده
وين امة الاسلام تثبت وجوده
يالله من منشاه مزنن رعوده
يمسح ذرى الطغيان وديان وآكام

والضاء الضمير العالمي مات مبطي
بقدر المصالح مخطي وغير مخطي
يعطي سلاح لذاك ولذاك يعطي
تجار موت ويربح وينتج افلام

الطاء طريق الخير والشر واضح
تبغى تناطح مين ودك تناطح
ماتسلم من الشر لونك تسامح
لاباع بياعن ولامشتري سام

الظاء ظلام الليل هالوقت حالك
فيه الفتن ياكبرها راس مالك
عن المكاسب لاتضيع حلالك
الله يجير من الفتن قطع الانسام

المسلم المضيوم في كل ديره
الله من فضله وجوده يجيره
لو طالت الايام ساعه قصيره
لابد ياتي يوم تحطيم الاصنام

شوف اليهود اوفعلم في فلسطين
كم شردوا كم قتلوا كم مساجين
محاصرين بارضهم تقل لاجين
يالله تفرجها على كل  منضام

ومسلم روهنغي وش  جراله بينمار
بوذي  حقود اوقاتل اومغتصب عار
للشيب  للشبان  مجـــــــــرم  وجزار
وين الذي يقضي على الظلم لازام

العين عين الله ترعى ملكنا
ابو فهد وقت الشدايد سندنا
من بعد رب الكون ذخر وسعدنا
اللي على خوض الصعيبات عزام

الغين غالي سيدي عند شعبه
يحبهم والشعب والله يحبه
يرعاه عن شر المعادين ربه
اسقى العداء كاس المهانه ولطَّام

للحوثي الغدار ذلّْه وهانه
يوم صبحه سيف الحزم في مكانه
نسىى حليب امه ونسَّاه امانه
حثالة الحقد المجوسي هالاقزام

الفاء فلا والله نهزم وننهان
باذن الولي والراس مرفوع لعنان
سما الوطن مادام قايده سلمان
عزْ اوفخر والمجد في كل الاعوام

ويسلم ولي العهد يسلم وليه
محمد السلمان من كل سيه
ريف المواطن والوطن والتحيه
لهم من الشعب السعودي ولايلام

في حب حكامه وفاء والتزامه
في عهد بيعه للمليك ومقامه
نوفي عهدنا لين يوم القيامه
مانبوق عهد ونولي الحب حكام

جيش العروبه مع سلاح الحدودي
اللي عـــن الحـد الجنوبي يذودي
نصـــرا مــــوزر والعـٰــدو اللدودي
ياجيش سلمان الحزم دك الاخصام

ولجل المواطن تسهرالداخليه
أمنه وامانه عـــن يدينٍ خفيه
كم أفشلت تخطيطهم باسبقيه
ابطال نايف رعب من يزرع الغام

القاف قلت الصدق والصدق ينقال
ببيات من فكري على كل الاحوال
يالله من مزنن من الغرب همال
يسقي بلاد إشعارها ذات الاكمام

الكاف كيف النفس ركعه وسجده
للي تكفل يافتى برزق عبده
الواحد الديان معبود وحده
ماله شريك وباللحم كاسي عظام

واللام لوم النفس ياقع عليها
مال البشر ياغانم العلم فيها
تصيب تخطي عملها مقتفيها
الآدمي مايمتلك كل مارام

الميم ماوقتي على كيف كيفي
ماطاعني لو ارفع اليوم سيفي
ماني بخايف لوزماني مخيفي
في دار عزن قادها نسل ضرغام

الها هلاك اهل الفتن والنمايم
ان طاعوا الشيطان واهل العمايم
اعدا امة الاسلام قاعد وقايم
سبابة اصحاب النبي شيب وغلام

والواو ويلك ياقشر الوجه ويلك
ماتهتني بالعيش لوزان ليلك
مع ممتعه جنبك رذيله وحيلك
ينهار وجه من الحيا معدم اعدام

والياء يارب الكون أصلي واسلم
على نبيا بلسم الجــرح بلسم
شربه لنا من الحوض يارب تقسم
ياربنا ياذا ألجلالي والاكرام

يارب ياللي عالمـــــا بالخفايا
العفو يوم نزور حوض المنايا
يالله وسع قبر ضاق ابخطايا
منا ورحمه منك ماخطت اقلام

 

سعيد محمد السحيمي البلوي

 

عن admin

Avatar

اترك تعليقاً

لن يتم نشر عنوان بريدك الإلكتروني.